ഇന്ന് മിക്കയാളുകളും പല സ്ഥലത്തും പോകുന്നത് ഗൂഗിള്‍ മാപ്പിന്‍റെ സഹായത്തോടെയാണ്. നമുക്കറിയാത്ത പല സ്ഥലങ്ങളും ഗൂഗിള്‍ മാപ്പിലുണ്ടാകും. അത്തരത്തില്‍ കൊച്ചിയിലുള്ളൊരു പുതിയ സ്ഥലമാണ് ഇപ്പോള്‍ വൈറലായിക്കൊണ്ടിരിക്കുന്നത്. കൊച്ചിയിലെ ഇൻഫോപാർക്കിനടുത്തുള്ള പ്രദേശത്തെ ഗൂഗിൾ മാപ് നോക്കുന്നവർക്കാണ് ഈ വിചിത്രമായ വ്യൂപോയിന്റ് കാണാനാവുക. 'ചെലപ്പോ പൊലീസ് കാണും. വെയർ ഹെൽമെറ്റ്' ഇതാണ് ആ സ്ഥലത്തിന്‍റെ പേര്.
എതോ ഒരു യാത്രികന്‍ അതുവഴി വരുന്ന യാത്രക്കാര്‍ക്ക് സഹായമാവുന്നതിനായി മാപ്പിൽ നൽകിയ മുന്നറിയിപ്പാണിത്. ഇത്തരത്തില്‍ ആര്‍ക്കും മാറ്റങ്ങള്‍ വരുത്താനാവുന്ന ഒന്നാണോ ഗൂഗിള്‍ മാപ്പ്? ഗൂഗിൾ മാപ്പിൽ വിവരങ്ങൾ എഡിറ്റ് ചെയ്യാനും മാറ്റങ്ങൾ നിർദ്ദേശിക്കാനുമുള്ള മാപ് മേക്കർ ടൂൾ 2017ൽ ഗൂഗിള്‍ നിർത്തിവച്ചശേഷം അതിന്റെ സ്ഥാനത്താണ് ലോക്കൽ ഗൈഡ്സ് പ്രോഗ്രാമും ബിസിനസ് പ്രൊഫൈൽ ആഡ് ചെയ്യാനുള്ള സംവിധാനവും ഗൂഗിള്‍ ആരംഭിച്ചത്. ഇതോടെ ഗൂഗിൾ അക്കൗണ്ടുള്ള ആർക്കും ഒരു പ്രാദേശിക ഗൈഡാകാന്‍ സാധിക്കും.
മൈ മാപ്സ് എടുത്തശേഷം ആവശ്യമുള്ള സ്ഥലത്ത് ഒരു പിൻഡ്രോപ് ചെയ്യാം. ആ സ്ഥലത്തെക്കുറിച്ചുള്ള വിവരണങ്ങളോ വിശദാംശങ്ങളോ മറ്റ് വിവരങ്ങളോ ചേര്‍ക്കുകയും ചെയ്യാം. വ്യൂ പോയിന്റിന്റെ തരത്തെ ആശ്രയിച്ച്, മാപ്പിൽ ദൃശ്യപരമായി വേർതിരിച്ചറിയാൻ ലഭ്യമായ ഓപ്ഷനുകളിൽ നിന്ന് നിങ്ങൾക്ക് പ്രസക്തമായ ഒരു മാർക്കർ ഐക്കൺ തിരഞ്ഞെടുക്കാം.
ഇനി വിവരങ്ങള്‍ നല്‍കി കഴിഞ്ഞാല്‍, അടിസ്ഥാന പിശകുകൾ, പൊരുത്തക്കേടുകൾ, സ്പാം എന്നിവ പരിശോധിക്കുന്ന ഓട്ടോമേറ്റഡ് സിസ്റ്റങ്ങളാൽ ആദ്യഘട്ടത്തിൽ ഗൂഗിൾ ഒരു അവലോകനം നടത്തും. പിന്നീട് അത് മറ്റു ലോക്കൽ ഗൈഡുമാർക്ക് ശരിയാണോയെന്ന് പരിശോധിക്കാൻ നൽകും. അവർ ഫ്ലാഗ് ചെയ്തില്ലെങ്കില്‍ അത് മാപ്പിൽ പ്രത്യക്ഷപ്പെടും. അവലോകന പ്രക്രിയയ്ക്ക് കുറച്ച് സമയമെടുക്കുമെന്നത് ശ്രദ്ധിക്കേണ്ടതാണ്, അതിനാൽ നിങ്ങളുടെ എഡിറ്റ് ഉടനടി പ്രത്യക്ഷപ്പെടില്ല. അതിനാൽ ചില തെറ്റുകൾ ഗൂഗിള്‍ മാപ്പിൽ അതേപോലെ തുടരാനും സാധ്യതയേറെയാണ്.
പ്രാദേശിക ബിസിനസുകൾ, സ്ഥലങ്ങൾ, എന്നിവയെ കുറിച്ചുള്ള വിവരങ്ങൾ നൽകാൻ ഉപയോക്താക്കളെ പ്രോത്സാഹിപ്പിക്കുന്ന ഗൂഗിളിന്റെ കമ്മ്യൂണിറ്റി-പ്രേരിതമായ സംരംഭമാണ് ഗൂഗിൾ ലോക്കൽ ഗൈഡ്സ് പ്രോഗ്രാം. അവലോകനങ്ങൾ എഴുതി, ചിത്രങ്ങളും വിഡിയോകളും ചേർത്ത്, ബിസിനസ് ലിസ്റ്റിങുകളിൽ കണ്ടെത്തിയ വിവരങ്ങൾ അപ്‌ഡേറ്റ് ചെയ്തും, ഗൂഗിൾ മാപ്‌സിലെ വിവിധ സ്ഥലങ്ങളെക്കുറിച്ചുള്ള ചോദ്യങ്ങൾക്ക് ഉത്തരം നൽകിക്കൊണ്ടും അവർ അവരുടെ അറിവും ഉപഭോക്തൃ അനുഭവങ്ങളും പങ്കിടുന്നു.
ഗൂഗിളിന്റെ സ്വന്തം ടൂൾസെറ്റ് ലഭിക്കാത്ത ഗ്രാമീണ മേഖലകളിൽ നിന്നുള്ള വിവരങ്ങൾ ക്രൗഡ് സോഴ്‌സ് ചെയ്യുന്നതിനുള്ള ഒരു മാർഗമായാണ്
2008-ൽ മാപ്പ് മേക്കർ ആരംഭിച്ചത്. കാലക്രമേണ, ഗൂഗിൾ മാപ്പിലെ പൊതു ഡാറ്റയിൽ വരുത്തിയ മാറ്റങ്ങൾക്ക് മേൽനോട്ടം വഹിക്കാനും അംഗീകാരം നൽകാനും ചുമതലപ്പെടുത്തിയ മാപ്പ് മേക്കർ എഡിറ്റർമാരുടെയും മോഡറേറ്റർമാരുടെയും കമ്യൂണിറ്റി ദശലക്ഷക്കണക്കിന് ഉപയോക്താക്കളുടെ ഒരു ഗ്രൂപ്പായി വളർന്നു. പിന്നീടാണ് റിവാർ‍ഡ് പ്രോഗ്രാമുകളുൾപ്പടെയുള്ള ലോക്കൽ ഗൈഡ് സംവിധാനം ആരംഭിച്ചത്.