ബേസില്‍ ജോസഫ്, നസ്രിയ എന്നിവര്‍ കേന്ദ്രകഥാപാത്രങ്ങളാവുന്ന സൂക്ഷ്മദര്‍ശിനിയുടെ ട്രെയിലര്‍ പുറത്ത്. ബേസിലും നസ്രിയയും ചേരുമ്പോള്‍ കോമഡി പ്രതീക്ഷിരുന്ന പ്രേക്ഷകരെ അമ്പരിപ്പിക്കുന്ന നിഗൂഢതകള്‍ ഒളിപ്പിച്ച ട്രെയിലറാണ് പുറത്തുവിട്ടിരിക്കുന്നത്. നായികയുടെ അയല്‍പക്കത്ത് പുതുതായി താമസിക്കാന്‍ വരുന്ന യുവാവിന്‍റെ വിചിത്രമായ പെരുമാറ്റവും അത് സൂക്ഷ്മമായി നിരീക്ഷിക്കാന്‍ ഇറങ്ങിതിരിക്കുന്ന യുവതിയുമാണ് ട്രെയിലറിലുള്ളത്.
ഒരു ഇടവേളക്ക് ശേഷം മലയാളത്തിൽ നായികയായി നസ്രിയ വീണ്ടും എത്തുന്ന ചിത്രം കൂടിയാണ് സൂക്ഷ്മദര്‍ശിനി. മണിയറയിലെ അശോകനാണ് ഒടുവില്‍ താരം മലയാളത്തില്‍ അഭിനയിച്ച ചിത്രം. എം.സി. ജിതിനാണ് സൂക്ഷ്മദര്‍ശിനി സംവിധാനം ചെയ്യുന്നത്. ഹാപ്പി ഹവേർസ് എന്റർടൈൻമെന്റ്, എ വി എ പ്രൊഡക്ഷൻസ് എന്നീ ബാനറുകളിൽ സമീർ താഹിർ, ഷൈജു ഖാലിദ്, എ.വി. അനൂപ് എന്നിവർ ചേർന്നാണ് ചിത്രം നിർമ്മിക്കുന്നത്.
ദീപക് പറമ്പോൽ, സിദ്ധാർഥ് ഭരതൻ, മെറിൻ ഫിൽപ്പ്, അഖില ഭാർഗവൻ, പൂജ മോഹൻരാജ്, കോട്ടയം രമേഷ്, ഗോപൻ മങ്ങാട്ട്, ജയ കുറുപ്പ് എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.