2024ലെ വമ്പന്‍ ഹിറ്റുകളില്‍ ഒന്നാണ് അല്ലു അര്ജുന് നായകനായ 'പുഷ്പ 2 ദി റൂള്‍'. സുകുമാര്‍ സംവിധാനം ചെയ്ത പുഷ്പയുടെ രണ്ടാം ഭാഗം ഏറെ നാളത്തെ കാത്തിരിപ്പിന് ശേഷമാണ് റിലീസ് ചെയ്തത്. 2021ല്‍ റിലീസ് ചെയ്ത 'പുഷ്പ ദി റൈസ്' മികച്ച അഭിപ്രായവും ബോക്സ് ഓഫീസ് വിജയവും നേടിയിരുന്നു. രണ്ടാം ഭാഗത്തിന് സമ്മിശ്ര അഭിപ്രായങ്ങള്‍ ഉയര്‍ന്നെങ്കിലും കളക്ഷനില്‍ ആദ്യഭാഗത്തെക്കാള്‍ ഏറെ മുന്നിലായിരുന്നു.
ഇനി ചിത്രത്തിന്‍റെ മൂന്നാം ഭാഗമായ 'പുഷ്പ ദി റാംപേജ്' എന്നാണ് റിലീസ് ചെയ്യുക എന്ന് വെളിപ്പെടുത്തിയിരിക്കുകയാണ് നിര്‍മാതാക്കള്‍. റോബിന്‍ഹുഡ് എന്ന തെലുങ്ക് ചിത്രവുമായി ബന്ധപ്പെട്ട ചടങ്ങിലാണ് മൈത്രി മൂവിമേക്കേര്‍സ് പങ്കാളി വൈ രവിശങ്കര്‍ പുഷ്പ 3 എപ്പോള്‍ വരും എന്ന കാര്യം വെളിപ്പെടുത്തിയത്.
'അല്ലു അര്ജുന് അടുത്തതായി ചെയ്യാന്‍ പോകുന്ന ചിത്രം അറ്റ്ലിയുമായി ചേര്‍ന്നാണ്. അത് പൂര്‍ത്തിയാക്കിയാല്‍ ത്രിവിക്രം ശ്രീനിവാസുമായി ചേര്‍ന്നാണ് അടുത്ത ചിത്രം. ഈ രണ്ട് ചിത്രങ്ങള്‍ക്ക് ശേഷമായിരിക്കും പുഷ്പ 3 ചെയ്യുക. ഈ രണ്ട് ചിത്രങ്ങള്‍ ചെയ്യാന്‍ അല്ലു അര്ജുന് രണ്ട് വര്‍ഷമെങ്കിലും വേണം. ഈ സമയം സുകുമാര്‍ രാം ചരണുമായി ഒരു ചിത്രം ചെയ്യും. ഈ ചിത്രം പൂര്‍ത്തിയാക്കുവാന്‍ രണ്ട് കൊല്ലം എടുക്കും. അതിന് ശേഷം മാത്രം ആയിരിക്കും അദ്ദേഹം പുഷ്പ 3 എഴുതുന്നത്. മൂന്നാം ഭാഗം രണ്ടര വര്‍ഷത്തിന് ശേഷമായിരിക്കും തുടങ്ങുന്നത്. മൂന്ന് വര്‍ഷങ്ങള്‍ക്ക് ശേഷം പുഷ്പ 3 എത്തും,' രവിശങ്കര്‍ പറഞ്ഞു.