'ഇത് ഒരു റിസര്‍ച്ചിന്‍റെ ഭാഗം'; ക്ലാസ്​മുറികളില്‍ ചാണകം തേച്ച് പ്രിന്‍സിപ്പല്‍

ഡല്‍ഹി യൂണിവേഴ്​സിറ്റിയുടെ കീഴിലുള്ള ലക്ഷ്​മി ഭായ് കോളേജിലെ ക്ലാസ്​മുറികളില്‍ ചാണകം തേക്കുന്ന പ്രിന്‍സിപ്പലിന്‍റെ ദൃശ്യങ്ങള്‍ സോഷ്യല്‍ മീഡിയയില്‍ വൈറലാവുന്നു. പ്രിന്‍സിപ്പലായ പ്രത്യുഷ് വല്‍സലയാണ് ക്ലാസ് മുറികളില്‍ ചാണകം തേച്ചത്. പ്രധാനാധ്യാപിക തന്നെയാണ് അധ്യാപകരുടെ വാട്​സാപ്പ് ഗ്രൂപ്പിലൂടെ ദൃശ്യങ്ങള്‍ പുറത്തുവിട്ടത്. 

കോളേജ് അധ്യാപകര്‍ നടത്തുന്ന ഒരു റിസര്‍ച്ചിന്‍റെ ഭാഗമാണിതെന്ന് പ്രിന്‍സിപ്പല്‍ പിടിഐയോട് പറഞ്ഞു. പാരമ്പരാഗത ഇന്ത്യന്‍ രീതികള്‍ അനുസരിച്ച് താപം നിയന്ത്രിക്കുന്നതിനെ പറ്റിയുള്ള പഠനമാണ് തങ്ങള്‍ നടത്തുന്നതെന്നും പ്രത്യുഷ് വല്‍സല കൂട്ടിച്ചേര്‍ത്തു.

'പഠനം ഇപ്പോഴും നടന്നുകൊണ്ടിരിക്കുകയാണ്. ഒരാഴ്​ചയ്​ക്ക് ശേഷമേ റിസര്‍ച്ചിന്‍റെ പൂര്‍ണമായ വിവരങ്ങള്‍ പുറത്തുവിടാനാവൂ. പ്രകൃതിദത്തമായ വസ്​തുക്കളില്‍ തൊടുന്നതുകൊണ്ട് ഒരു പ്രശ്​നവുമില്ല. ചിലര്‍ പൂര്‍ണമായ വിവരങ്ങള്‍ അറിയാതെ തെറ്റിദ്ധാരണകള്‍ പരത്തുന്നു,' പ്രത്യുഷ് വല്‍സല പറഞ്ഞു.