പിടികൂടിയ വിഷപ്പാമ്പിനെ കഴുത്തിൽ ചുറ്റി രണ്ട് മണിക്കൂറിലേറെ ഗ്രാമത്തിൽ പ്രകടനം നടത്തിയ വ്യക്തി അതേ പാമ്പിന്റെ കടിയേറ്റ് ദാരുണാന്ത്യം. ഉത്തർപ്രദേശിലെ ഷാജഹാൻപൂരിൽ നിന്നാണ് ഈ വാർത്ത. പാമ്പിനെ പിടിക്കുന്നതിൽ നാട്ടിൽ പ്രസിദ്ധനായ ദേവേന്ദ്ര മിശ്രയാണ് പാമ്പ് കടിയേറ്റ് മരിച്ചത്.
അയൽവാസിയുടെ വീട്ടിൽ നിന്നാണ് ഇയാൾ വിഷപ്പാമ്പിനെ പിടികൂടിയത്. പിടിച്ച പാമ്പിനെ സുരക്ഷിതസ്ഥാനത്തേക്ക് മാറ്റാതെ ഇയാൾ കഴുത്തിലിട്ട് പ്രകടനം നടത്തുകയായിരുന്നു. ഏകദേശം രണ്ട് മണിക്കൂറിലേറെ ഇയാൾ പാമ്പിനെ കഴുത്തിൽ ചുറ്റി ഗ്രാമത്തിലൂടെ നടന്നു. ഇടയ്ക്ക് ഒരു കുട്ടിയുടെ കഴുത്തിലും ഇയാൾ പാമ്പിനെ ഇട്ടുനൽകുന്നതും പ്രചരിക്കുന്ന വിഡിയോയിൽ കാണാം. പിന്നീട് ഇയാളെ ഇതേ പാമ്പ് കടിക്കുകയായിരുന്നു. എന്നാൽ കടിയേറ്റിട്ടും ഇയാൾ ആശുപത്രിയിൽ പോകാൻ തയാറായില്ലെന്നും കുറച്ച് സമയത്തിന് ശേഷം മരിച്ചുവീണെന്നും നാട്ടുകാർ പറയുന്നു.