ഉറപ്പുകളെല്ലാം വെറുതെ; തലസ്ഥാനത്തെ റോഡുകള്‍ ഇനിയും സ്മാര്‍ട്ടായില്ല
- Kerala
- Published on Jun 16, 2024, 08:19 AM IST
തിരുവന്തപുരത്തെ റോഡ് പണി പൂര്‍ത്തിയാക്കുമെന്ന് അധികൃതര്‍ പറഞ്ഞ ജൂണ്‍ പതിനഞ്ചും കഴിയുമ്പോള്‍ ഉറപ്പുകളെല്ലാം കുറുപ്പിന്‍റെ ഉറപ്പായി അവശേഷിക്കുകയാണ്. നിര്‍മാണം നടക്കുന്ന പത്തു റോഡുകളില്‍ 5 എണ്ണത്തില്‍ പണി പകുതിപോലും ആയിട്ടില്ല . മന്ത്രിമാരുടെ തരാതരം ഉറപ്പുകള്‍ കേട്ട് നിലവിലെ പണിയും കണ്ടു വരാം.
ജനറല്‍ ആശുപത്രി വഞ്ചിയൂര്‍ റോഡ് പകുതി ഭാഗത്തും വലിയ കുഴികള്‍ കാണാം. കുറച്ചു ദൂരം ആദ്യഘട്ട ടാറിങ് നടത്തി. ഓവര്‍ബ്രിജ് – ഉപ്പിടാംമൂട് റോഡ് ചെട്ടികുളങ്ങര വരെ ടാര്‍ ചെയ്തു. ബാക്കി ഭാഗത്ത് മെറ്റല്‍ നിരത്തുന്നതേയുളളു. എം ജി രാധാകൃഷ്ണന്‍ റോഡില്‍ മെറ്റല്‍ നിരത്തുന്ന ജോലികളാണ് നടക്കുന്നത്. ഓടയുടെ നിര്‍മാണമൊന്നും എങ്ങുമെത്തിയിട്ടില്ല.
ബേക്കറി – ഫോറസ്റ്റ് ഓഫിസ് റോഡില്‍ മാന്‍ഹോളുകളുടെ നിര്‍മാണം പുരോഗമിക്കുന്നു. കിളളിപ്പാലം – അട്ടക്കുളങ്ങര റോഡില്‍ ഓടകളുടെ സ്ഥാനത്ത് ആഴമേറിയ കുഴികളാണെങ്ങും. 2019 ലാണ് നഗര റോഡുകള്‍ സ്മാര്‍ട്ട് ആക്കാന്‍ തുടങ്ങിയത്. റോഡു പണി തീര്‍ന്നില്ലെന്ന് മാത്രമല്ല , നമ്മുടെ സങ്കല്പത്തിലെ സ്മാര്‍ട് റോഡില്‍ കാണേണ്ട ഭൂമിക്കടിയിലൂടെയുളള കേബിളുകള്‍ , ആധുനിക രീതിയിലുളള ഓടകള്‍ , തെരുവു വിളക്കുകള്‍ ഇതൊന്നും അടുത്ത കാലത്തൊന്നും സ്മാര്‍ട്ട് ആകുന്ന ലക്ഷണമില്ല.
