എ.ഡി.ജി.പിക്കെതിരായ അന്വേഷണച്ചുമതല തിരുവനന്തപുരം ഒന്നാം നമ്പര്‍ യൂണിറ്റിന്

എ.ഡി.ജി.പി: എംആര്‍ .അജിത്കുമാറിനെതിരായ വിജിലന്‍സ് അന്വേഷണത്തിന്റെ ചുമതല തിരുവനന്തപുരത്തെ ഒന്നാം നമ്പര്‍ യൂണിറ്റിന്. എസ്.പി ജോണിക്കുട്ടിയാണ് അന്വേഷണ ഉദ്യോഗസ്ഥന്‍. വിജിലന്‍സ് മേധാവി യോഗേഷ് ഗുപ്ത നേരിട്ട് മേല്‍നോട്ടം വഹിക്കും. കേസെടുക്കാതെയുള്ള പ്രാഥമിക അന്വേഷണമാണ് നടത്തുക. എസ്.പി സുജിത് ദാസിനെതിരെയും അന്വേഷണമുണ്ട്. മലപ്പുറം ക്യാംപ് ഓഫീസിലെ മരംമുറി, മലപ്പുറത്തെ സ്വര്‍ണവേട്ടയിലെ തട്ടിപ്പ്, കവടിയാറിലെ കെട്ടിടനിര്‍മാണം, അനധികൃത സ്വത്ത് സമ്പാദനം തുടങ്ങി അഞ്ച് വിഷയങ്ങളാണ് വിജിലന്‍സ് അന്വേഷിക്കുന്നത്.