ഭാസ്കര കാരണവര്‍ വധക്കേസ് പ്രതി ഷെറിന്‍റെ ജയില്‍മോചനത്തിനായി മന്ത്രി കെ.ബി.ഗണേഷ്കുമാര്‍ ഇടപെട്ടെന്ന് ജ്യോതികുമാര്‍ ചാമക്കാല. ഗണേഷിന്റെ അനുയായി കോട്ടാത്തല പ്രദീപും ഇടപെട്ടു. പ്രതിയോടൊപ്പം പ്രദീപ് പലവട്ടം പൊലീസ് സ്റ്റേഷനില്‍ പോയിട്ടുണ്ട്. പറഞ്ഞത് തെറ്റാണെങ്കില്‍ തനിക്കെതിരെ കേസെടുക്കട്ടെയെന്നും ജ്യോതികുമാര്‍ കൗണ്ടര്‍പോയന്റില്‍ പറഞ്ഞു.
Read Also: ‘ഷെറിന് മാനസാന്തരപ്പെട്ടു; എല്ലാക്കാലത്തും ഒരാളെ കുറ്റവാളിയായി കാണരുത്’
ഭാസ്കര കാരണവര്‍ വധക്കേസ് പ്രതി ഷെറിന്‍റെ ജയില്‍മോചനത്തിനായി മന്ത്രിസഭാ ശുപാര്‍ശ മുന്‍ഗണനകള്‍ ലംഘിച്ചത് വിവാദമായിരുന്നു. 20 വര്‍ഷം തടവുശിക്ഷ അനുഭവിച്ചവരേയും പിന്തള്ളിയാണ് തീരുമാനം. മൂന്നുമാസംകൊണ്ട് ശുപാര്‍ശ ആഭ്യന്തരവകുപ്പ് വഴി മന്ത്രിസഭയിലെത്തി. ശിക്ഷയിളവ് ജയില്‍ ഉപദേശകസമിതി ശുപാര്‍ശചെയ്തത് ഡിസംബറിലായിരുന്നു. വിവിധ ജയിലുകളില്‍ ഷെറിന് ഉണ്ടാക്കിയ പ്രശ്നങ്ങളും അവഗണിച്ചു. ഇതേ കേസില്‍ ജയില്‍ശിക്ഷ അനുഭവിച്ച ബാസിത്തിനേയും പരിഗണിച്ചില്ല.
ജീവപരന്ത്യം ശിക്ഷാ കാലാവധിയായ 14 വര്‍ഷം പൂര്‍ത്തിക്കിയതിനെ തുടര്‍ന്ന് ശിക്ഷാ ഇളവിനുള്ള ശുപാര്‍ശ മന്ത്രിസഭ അംഗീകരിക്കുകയായിരുന്നു. 2009 ലാണ് ഭര്‍ത്താവിന്‍റെ അച്ഛനായ ഭാസ്ക്കര കാരണവരെ കൊന്ന കേസില്‍ ഷെറിന് പിടിയിലാകുന്നത്. മരുമകള്‍ ഷെറിന് , അവരുടെ സുഹൃത്തുക്കളായ ബിബീഷ്, നിഥിന്‍, ഷാനു റഷീദ് എന്നിവരും കൂട്ടു പ്രതികളായി. കൊലപാതകം, ഗൂഢാലോചന, കുറ്റംചെയ്യാൻ പ്രേരിപ്പിക്കൽ, തെളിവ് നശിപ്പിക്കൽ, കവർച്ച , ദേഹോപദ്രവം എന്നീ കുറ്റങ്ങൾ തെളിഞ്ഞതിനെ തുടര്‍ന്നാണ് പ്രതികളെ 2010 ല്‍ കോടതി ശിക്ഷിച്ചത്.
തിരുവനന്തപുരം സെന്‍ട്രല്‍ ജയില്‍ 14 വര്‍ഷം തടവ് പൂര്‍ത്തിയാക്കിയതിനെ തുടര്‍ന്ന് ഷെറിന് ശിക്ഷാ ഇളവ് നല്‍കാന്‍ ജയില്‍ ഉപദേശക സമിതിയും ജയില്‍മേധാവിയും ശുപാര്‍ശ ചെയ്യുകയായിരുന്നു. മന്ത്രിസഭ ഇത് അംഗീകരിച്ചു. മന്ത്രിസഭയുടെ തീരുമാനം ഗവര്‍ണര്‍ അംഗീകരിച്ചാലെ ജയില്‍മോചനത്തിനുള്ള നടപടികള്‍ തുടങ്ങാനാവൂ. 35 വര്‍ഷം ന്യൂയോര്‍ക്കില്‍ ജോലിചെയ്ത ഭാസ്ക്കര കാരണവരുടെ ഇളയമകനായ ബിനുവിന്റെ ഭാര്യയായിരുന്നു പത്തനാപുരം സ്വദേശിനിയായ ഷെറിന്. സ്വത്ത് സബന്ധിച്ച തര്‍ക്കമാണ് കൊലപാതകത്തിന് വഴിവെച്ചത് എന്നാണ് പൊലീസ് കണ്ടെത്തിയത്. അന്ന് ഐജിയായിരുന്ന വിന്‍സണ്‍ എം.പോളിന്‍രെ മേല്‍നോട്ടത്തിലായിരുന്നു അന്വേഷണം. കാരണവരുടെ മക്കളായ ബിജു, ബെറ്റ്‌സി, ബിനു എന്നിവർ അമേരിക്കയിലായിരുന്നു.