പാലക്കാട് ഉപതിരഞ്ഞെടുപ്പ് ഫലം വന്നതിന് പിന്നാലെ രാഷ്ട്രീയം പറയാതെ ഷാഫി പറമ്പില്‍ എം.പിയുടെ വിഡിയോ. കോഴിക്കോട് സ്വകാര്യ ആശുപത്രിയില്‍ കഴിയുന്ന അശ്വന്‍ എന്ന ചെറുപ്പാക്കാരന് സഹായം തേടിയാണ് ഷാഫിയുടെ വിഡിയോ. കോയമ്പത്തൂരില്‍ നടന്ന ആര്‍മി ടെസ്റ്റിനിടെയാണ് യുവാവിന് വീണു പരുക്കേറ്റത്. തുടയെല്ല പൊട്ടിയ അശ്വനെ കോഴിക്കോട് മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ശസ്ത്രക്രിയ്ക്കുള്ള സമയം നിശ്ചയിക്കാനായില്ല. ഇതോടെ യുവാവ് അബോധവസ്ഥയിലെത്തി.
തുടര്‍ന്ന് കോഴിക്കോട് സ്വകാര്യ ആശുപത്രിയില്‍ എത്തിച്ച് ചികില്‍സിച്ചു. എന്നാല്‍ ഐ.സി.യു അടക്കമുള്ള ചികില്‍സ ചിലവ് കുടുംബത്തിന് താങ്ങാവുന്നതിനും അപ്പുറമാണ്. അശ്വന്റെ പിതാവ് സുനില്‍ കുമാറിന്റെ ഡ്രൈവര്‍ ജോലിയാണ് കുടുംബത്തിന്റെ വരുമാനമാര്‍ഗം. 24 വയസ്സുള്ള അനിയന്റെ ജീവിതം തിരികെ കൊണ്ടുവരാന്‍ വേണ്ടി എല്ലാവരും ഒന്നിച്ചു നില്‍ക്കണമെന്നും ഷാഫി അഭ്യര്‍ഥിക്കുന്നു. തിരഞ്ഞെടുപ്പ് വിജയത്തിന് പിന്നാലെ വന്ന വിഡിയോക്ക് നിരവധി പേരാണ് സഹായം ഉറപ്പുനല്‍കി രംഗത്തെതിയത്.