അണ്ടര്‍-17 യൂറോ ചാംപ്യന്‍ഷിപ്പിന്റെ തനിയാവര്‍ത്തനമാണ് ഇത്തവണത്തെ ലോകകപ്പ് ഫൈനല്‍. ലോകകിരീടം നേടാന്‍ യൂറോപ്യന്‍ ചാംപ്യന്‍മാരായ സ്പെയിന്‍ റണ്ണറപ്പുകളായ ഇംഗ്ലണ്ടിനെ നേരിടും. പെനല്‍ട്ടി ഷൂട്ടൗട്ടിലാണ് സ്പെയിന്‍ യൂറോ കപ്പില്‍ ഇംഗ്ലണ്ടിന്റെ കൗമാരപ്പടയെ മറികടന്നത്
2 ഗോളുകള്‍ വീതമടിച്ച് ഒപ്പത്തിനൊപ്പം നിന്ന ഇംഗ്ലണ്ടും സ്പെയിനും പെനല്‍ട്ടിയുടെ ജീവന്‍മരണക്കളിയിലേക്ക് നീങ്ങിയപ്പോള്‍ ക്രൊയേഷ്യന്‍ മണ്ണില്‍ ഇംഗ്ലണ്ടിന് രണ്ടാം സ്ഥാനം കൊണ്ട് തൃപ്തിപ്പെടേണ്ടി വന്നു
ഈ തോല്‍വിക്കൊരു പകരം വീട്ടലിനാവും ഇംഗ്ലണ്ട് കൊല്‍ക്കത്തയിലേക്ക് വണ്ടി കയറുന്നത്. തോല്‍വി അറിയാത്ത കുതിപ്പ് നടത്തിയ ഇംഗ്ലണ്ടിന് പക്ഷെ എളുപ്പമാകില്ല സ്പാനിഷ് പരീക്ഷ. കൊച്ചിയില്‍ ബ്രസീലിനോട് ആദ്യമല്‍സരത്തില്‍ തോല്‍വി വഴങ്ങിയ ശേഷം ഫ്രാന്‍സിനെയും ഇറാനെയുമടക്കം തകര്‍ത്താണ് സ്പാനിഷ് പട ഫൈനലിലേക്ക് കുതിച്ചത്. ലാറ്റിനമേരിക്കയുടെ സൗന്ദര്യവും ആഫ്രിക്കയുടെ കരുത്തും ലോകഫൈനലില്‍ കടക്കാതെ പിന്‍വാങ്ങി. ശനിയാഴ്ച യൂറോപ്യന്‍ കൊടുങ്കാറ്റാണ് ബംഗാള്‍ തീരത്ത് ആഞ്ഞടിക്കാന്‍ പോകുന്നത്.
