ചലചിത്രപ്രേമികള്‍ കാത്തിരുന്ന ചിത്രം ഹസീന പാര്‍ക്കര്‍ വെള്ളിയാഴ്ച പ്രദര്‍ശനം ആരംഭിക്കും. ദാവൂദ് ഇബ്രാഹിമിന്‍റെ സഹോദരിയുടെ കഥ പറയുന്ന ചിത്രത്തില്‍ ശ്രദ്ധാ കപൂറാണ് നായിക.
ഇതിനകം നിരവധി വിവാദങ്ങള്‍ ഉയര്‍ത്തിയ ചിത്രമാണ് ഹസീന പാര്‍ക്കര്‍. ഹസീന ക്യൂന്‍ ഓഫ് മുംബൈ എന്നായിരുന്നു സിനിമയുടെ ആദ്യ പേര്. എതിര്‍പ്പുകളെ തുടര്‍ന്ന് ഹസീന പാര്‍ക്കര്‍ എന്ന് മാറ്റുകയായിരുന്നു. ശ്രദ്ധ ടൈറ്റില്‍ റോളില്‍ എത്തുന്ന ആദ്യ ചിത്രം കൂടിയാണിത്.
ക്രൈം ത്രില്ലറായി ഒരുക്കിയിരിക്കുന്ന സിനിമ യഥാര്‍ത്ഥ സംഭവങ്ങളെ കോര്‍ത്തിണക്കിയാണ് ഒരുക്കിയിരിക്കുന്നത്. ദാവൂദ് ഇബ്രാഹിമിന്‍റെ സഹോദരിയായി ശ്രദ്ധ കപൂര്‍ എത്തുമ്പോള്‍ ദാവൂദ് ഇബ്രാഹിമായി ശ്രദ്ധയുടെ സഹോദരന്‍ സിദ്ധാനന്ദ് കപൂര്‍ വേഷമിടുന്നു. അങ്കൂര്‍ ഭാട്ടിയയാണ് ചിത്രത്തിലെ മറ്റൊരു താരം.
അപൂര്‍വ ലാക്കിയാണ് ഹസീന പാര്‍ക്കറിന്‍റെ ജീവിതകഥ വെള്ളിത്തിരയില്‍ എത്തിക്കുന്നത്. സംഗീതം സച്ചിന്‍ ജിഗാര്‍. വെള്ളിയാഴ്ച പ്രദര്‍ശനം ആരംഭിക്കുന്ന ചിത്രം വിവാദങ്ങള്‍ക്ക് വഴിവെക്കുമോയെന്നാണ് ഏവരും കാത്തിരിക്കുന്നത്.
