കൊല്ലം കടയ്ക്കലിൽ പതിനേഴുകാരിയെ പ്രണയം നടിച്ച് പീഡിപ്പിച്ച കേസില്‍ പ്രതി പിടിയില്‍. തൃശൂർ സ്വദേശി നൗഫലിനെയാണ് കടയ്ക്കല്‍ പൊലീസ് പിടികൂടിയത്. പെണ്‍കുട്ടിയെ തട്ടിക്കൊണ്ടുപോയി പീഡിപ്പിച്ചെന്ന പരാതിയിലാണ് പൊലീസിന്റെ നടപടി. പ്രതിക്കെതിരെ പോക്സോ നിയമപ്രകാരമാണ് കേസെടുത്തത്.
കടയ്ക്കൽ സ്വദേശിനിയായ പതിനേഴുകാരിയെ ഫെയ്‌സ്ബുക്കിലൂടെയാണ് പ്രതി പരിചയപെട്ടത്. പിന്നീട് വിവാഹ വാഗ്ദാനം നല്‍കി പീഡിപ്പിച്ചെന്നാണ് പരാതി. തൃശൂർ പയ്യന്നൂർ സ്വദേശി നൗഫല്‍ മകളെ തട്ടിക്കൊണ്ടുപോയെന്ന് കാട്ടി മാതാപിതാക്കള്‍ നല്‍കിയ പരാതിയിലാണ് പൊലീസിന്റെ നടപടി. കുട്ടിയെ കാണാതായതിനെ തുടർന്നു മാതാപിതാക്കൾ നല്‍കിയ പരാതിയില്‍ അന്വേഷണം നടത്തിയ പൊലീസിന് ഇരുവരും പാലക്കാട്ട് ഉള്ളതായി വിവരം ലഭിച്ചു. തുടർന്ന് പാലക്കാട്ടിൽ നിന്ന് നൗഫലിനെ അറസ്റ്റ് ചെയ്ത പൊലീസ്, പെണ്‍കുട്ടിയെ മാതാപിതാക്കള്‍ക്കൊപ്പം വിട്ടു. തന്നെ പ്രണയം നടിച്ച് തട്ടിക്കൊണ്ടുപോയെന്ന് പെണ്‍കുട്ടി പരാതി നല്‍കി.
പോക്സോ നിയമപ്രകാരമാണ് പ്രതിക്കെതിരെ കേസെടുത്തിരിക്കുന്നത്. പ്രായപൂർത്തിയാകാത്ത പെണ്‍കുട്ടിയെ തട്ടികൊണ്ട് പോയി എന്ന കുറ്റവും പ്രതിക്കെതിരെ ചുമത്തിയിട്ടുണ്ട്. കടയ്ക്കൽ കോടതിയിൽ ഹാജരാക്കിയ പ്രതിയെ റിമാന്റ് ചെയ്‌തു.
