വൃക്കകള്‍ രണ്ടും തകരാറിലായ രണ്ടുയുവാക്കള്‍ക്കുവേണ്ടി പാട്ടുപാടി പണം കണ്ടെത്തുകയാണ് കലാകാരന്മാരുടെ കൂട്ടായ്മ. ആലപ്പുഴ എരമല്ലൂരിലെ അഖില കലാസമിതിയാണ് ഒരുപകല്‍ മുഴുവന്‍ ഗാനമേള ഒരുക്കിയത്.
ഈ പാട്ട് വെറുതെ ആസ്വദിക്കാനുള്ളതല്ല. നിരാലംബരായ രണ്ടുയുവാക്കളെ ജീവിതത്തിലേക്ക് തിരികെകൊണ്ടുവരാനുള്ള പ്രയത്നമാണ്. പാട്ട് ഇഷ്ടമായാലും ഇല്ലെങ്കിലും ഈ പാത്രത്തില്‍ പണം വീഴണം. എങ്കിലേ എഴുപുന്ന പഞ്ചായത്തിലെ ഇരുപതുകാരനായ സിബി ആന്റണിക്കും ഇരുപത്തിയെട്ടുകാരനായ അജയ്ഘോഷിനും ഒരു ജീവിതമുള്ളു. വൃക്ക മാറ്റിവയ്ക്കാന്‍ പണമില്ലാതെ ഇരുവരും ആലപ്പുഴ, കോട്ടയം മെഡിക്കല്‍ കോളജ് ആശുപത്രികളില്‍ ചികില്‍സയിലാണ്. കൂലിപ്പണിക്കാരായ കുടുംബത്തിനെക്കൊണ്ട് സാധ്യമാവാത്ത തുക കണ്ടെത്താനുളള ഒരു വഴിമാത്രമാണ് ഈ പാട്ട്.
എരമല്ലൂര്‍ ജംക്ഷനില്‍ നടന്ന ഗാനമേളയില്‍ പാടിയതെല്ലാം ആര്‍ദ്രഗീതങ്ങള്‍. ഒരു പകല്‍മുഴുവന്‍ പാട്ടുപാടികിട്ടിയ തുക ചികില്‍സാകമ്മിറ്റിക്ക് കൈമാറും.
