തിരുവനന്തപുരം കാട്ടാക്കട അമ്പൂരിയിൽ അഞ്ചാംക്ലാസുകാരിയെ പീഡിപ്പിച്ച വൈദികനെ പൊലീസ് അറസ്റ്റ് ചെയ്തു. കണ്ടംതിട്ട പള്ളിയിലെ വൈദികനായ ദേവരാജനാണ് അറസ്റ്റിലായത്. പള്ളിക്ക് സമീപത്തുള്ള മുറിയിൽ വച്ച് പെൺകുട്ടിയെ പീഡിപ്പിച്ചെന്നാണ് കേസ്.
ഞായറാഴ്ച വൈകിട്ട് അഞ്ചുമണിയോടെയാണ് കേസിനാസ്പദമായ സംഭവം നടന്നത്. പള്ളിയോട് ചേർന്നുള്ള മുറിയിൽ വച്ച് വൈദികൻ അഞ്ചാംക്ലാസുകാരിയെ പീഡനത്തിനിരയാക്കുകയായിരുന്നു. കുട്ടിയെ തിരഞ്ഞുവന്ന പിതാവ് ഇക്കാര്യം നേരിൽ കണ്ടു. വൈദികൻ ഒത്തുതീർപ്പിന് ശ്രമിച്ചെങ്കിലും കുട്ടിയുടെ പിതാവ് നെയ്യാർ ഡാം പൊലീസ് സ്റ്റേഷനിൽ പരാതി നൽകി. മാതാപിതാക്കളുടെ മൊഴിയുടെ അടിസ്ഥാനത്തിൽ പൊലീസ് കേസെടുത്തു.
ഈ സമയം കൊണ്ട് വൈദികൻ കാരക്കോണത്തുള്ള ആശുപത്രിയിൽ അഡ്മിറ്റായി. രാത്രിയോടെ ആര്യനാട് എസ്.ഐയുടെ നേതൃത്വത്തിലുള്ള പൊലീസ് സംഘം ആശുപത്രിയിൽ എത്തി വൈദികനെ അറസ്റ്റ് ചെയ്യുകയായിരുന്നു. പ്രതിയെ കാട്ടാക്കട മജിസ്ട്രേറ്റ് കോടതി റിമാൻഡ് ചെയ്തു.
