വലിയ വിമാനങ്ങൾക്കേർപ്പെടുത്തിയ നിയന്ത്രണം കരിപ്പൂരിൽ നിന്നുള്ള ചരക്കു നീക്കത്തെ തളർത്തി. കയറ്റ് ഇറക്കുമതി ഏജൻസികളിൽ 40 ശതമാനവും നെടുമ്പാശേരിയിലേക്ക് ആസ്ഥാനം മാറ്റി. യാത്രക്കാരുടെ എണ്ണത്തിലും കാര്യമായ കുറവുണ്ടായി. ഇടത്തരം വലിയ വിമാനങ്ങളുടെ സർവീസ് പുനരാരംഭിക്കാനുള്ള തീരുമാനത്തെ ഏറെ പ്രതീക്ഷയോടെയാണ് ഈ മേഖലയുമായി ബന്ധപ്പെട്ട് പ്രവർത്തിക്കുന്നവർ കാണുന്നത്.
പഴവും പച്ചക്കറികളുമാണ് കരിപ്പൂർ വഴി ഗൾഫ് രാജ്യങ്ങളിലേക്ക് പ്രധാനമായും കയറ്റി അയച്ചിരുന്നത്. ചെറിയ വിമാനങ്ങളിൽ പരമാവധി മൂന്നോ നാലോ ടൺ മാത്രമാണ് കയറ്റാനാവുന്നത്. വലിയ വിമാനങ്ങളിൽ ഇത് 30 ടൺവരെയാണ് . കരിപ്പൂര് ഉപയോഗപ്പെടുത്തിയിരുന്ന രാജ്യാന്തര യാത്രക്കാരുടെ 35 ശതമാനവും മറ്റ് വിമാനത്താവളങ്ങൾ തേടിപ്പോയി.ഇതുമൂലം 34 ശതമാനത്തോളം വരുമാന നഷ്ടവുമുണ്ടായി.
×